August 2010 September 2010 October 2010
Mo Tu We Th Fr Sa Su
1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30

IITV

Banner

Media

NUEVO vídeo de II-SP Galiza Internacionalista aragones galego català castellano asturianu euskara
Manifiesto PDF Print E-mail
Somos asistindo a la mayor crisis d’o capitalismo d’as zaguers güitanta añadas, y de nuebas os gubiernos d’a Unión Europeya quieren que bosen as suyas consecuenzias os treballadors y os sectors populars. En toda Europa, os despidos, os expediens de regulazión d’empleo y a no renobazión de contratos se tornan diyariamén en o drama de millons de personas condenadas a l’ature, a pobreza y a miseria.
Os gubiernos europeyos furtan en as caixas publicas ta rescatar a os banquers y aduyar a las grans intrepresas, con o desempleo tot creixendo a tot estruzio. Ye a Europa d’as pribatizazions, d’o Plan Bolonia ta mercantilizar l’amostranza superior, d’a Directiba Bolkenstein u d’a Directiba d’o Retorno contra os treballadors inmigrans, que empenta a xenofobia y o razismo.
A crisis actual, como no podeba estar d’atra traza, antimás d’as suyas consecuenzias economicas y sozials, ye probocando importans transformazions politicas, que se beyerán abrutidas en un futuro amanau.

En o caso de l’Estau español, a crisis, a global y a propia, son contribuyendo a deixar, d’una traza definitiba, a o descubierto as carenzias d’o Gubierno de Rodríguez Zapatero y d’o rechimen borbonico surtiu d’o clamau prozeso de “transizión”: corrupzión, cheneralizada, emplego d’a represión legal u ilegal como traza recurrén d’enfrontinar os conflictos sozials y politicos con os sectors populars, precariedat d’os serbizios sozials, sistemas educatibos escanaus…

Mui espezialment, surten as grabismas mancas democraticas d’un rechimen cuyo Chefe d’Estau, Juan Carlos I, fue impuesto por Franco, rechimen que, en consonanzia con ista situazión aberrán, ye incapaz de desembolicar una lei d’a memoria istorica que reconoixca a reyalidat d’a resistenzia antifaixista d’os nuestros pueblos.
Bi ha una corrién imboluzionista, neofaixista, empentada por sectors poderosos d’o capitalismo español y o suyo tarabidau instituzional y meyatico, que tiene dos caras: a “moderna”, cuya expresión más siñalera ye a UpyD, y a “tradizional”, cuyo tozuelo ye a Conferencia Episcopal Española. Dita corrién imboluzionista, con as suyas diferens expresions, ye la que por istas embueltas ye endrezando a l’alazet estratechico d’o bloque dominán español, incluyiu o Gubierno de l’Estau. Una estratechia que se materializa, entre atras cosas, en l’alianza PP-PSOE ta conseguir o gubierno bascongau con un obchetibo platero: a españolizazión d’ixe territorio.
A l’atro costau somos as fuerzas soberanistas y independentistas de cuchas, as fuerzas politicas d’a cucha estatal respetuosas con os dreitos nazionals d’os diferens pueblos oprimius por l’Estau español, asinas como importans mobimientos sozials y sindicals, entre los que destacan o mobimiento antifaixista; o mobimiento contra la pribatizazión d’a sanidat, a educazión y os serbizios publicos; as luitas obreras contra os EREs y despidos; a luita d’os estudians contra o Plan Bolonia; os mobimientos de mullers… De bez, belunos d’os mobimientos sozials tienen una importán articulazión nazional-popular, en espezial en os pueblos an que o prozeso politico soberanista ya más enantau.
Consideramos que bi ha capazidat prou como ta endrezar en un sentiu anticapitalista y democratico ixe deseyo cada begada más ixamplau de cambio radical, encara que a diya de güe dita capazidat tienga un desembolique desigual en as nuestras respectibas nazions.
Partindo d’ista balorazión, empentamos iste manifiesto, cuyos alazez son:

  • Chustizia sozial. Que a crisis la bosen qui la han probocada: os capitalistas. O capitalismo español tiene rasgos agresibos que rabian, como a firme precariedat laboral, causa d’a mayor tasa d’ature y d’empleo ebentual d’a UE. Y agora a pretensión d’o sistema ye puyar unatro escalón más en o relatibo a la explotazión y a os retallos sozials.
    A chen que refirmamos iste manifiesto nos comprometemos a empentar a mobilizazión ta frenar ditos propositos, exichindo un plan de rescate d’os treballadors, sin miedo a proposar ta ello midas anticapitalistas.
  • Libertaz democraticas plenas. Somos comprobando cómo, china chana, se ban retallando os ya de por sí retallaus dreitos zebils existens, tals como o dreito a la no discriminazión por razons ideolochicas, de luenga y cultura, d’edat u de chenero. O dreito a la libre expresión, o dreito a no estar represaliau, torturau u prozesau por as propias ideyas. O dreito a botar y estar botau.
    O Estau español no rispeta a soberanía d’as dibersas nazions baixo a suya churisdiczión ni d’o conchunto d’os pueblos. I hai un tarabidau churidico-politico creyau en a transizión que ha tornau a l’Estau en una garchola de pueblos y de chen, asinas como en un reposte de corrupzión.
  • No a la discriminazión de chenero. Pero no como nomás un enunziau formal y buedo de conteniu, sino como una exichenzia normatiba, churidica y practica que posibilite reyalmén a fin d’a discriminazión. Lo cual bi incluye, entre atras cosas, o dreito y a posibilidat reyal de control d’as mullers sobre o suyo cuerpo, a suya sexualidat y a suya capazidat reproductiba.
  • Dreitos politicos. Reibindicamos os dreitos negaus por o rechimen actual, entre lo que cal destacar o dreito de toz os pueblos de dezidir de traza soberana o suyo esbenidero, y no como un feito isolau sino como un dreito cutiano, ye dizir o dreito d’autodeterminazión. O dreito de cada pueblo a dezidir as suyas trazas de gubierno y a la normalizazión d’a suya luenga y a suya cultura nazional.
  • Contra a Europa d’o capital. Somos en contra d’a Europa d’o capital y a fabor d’a Europa d’os pueblos. Somos en contra d’a OTAN como expresión melitar d’o imperialismo y, por tanto, exichimos a retirada de l’Estau español de dita alianza melitar. Somos en contra d’a especulazión y o meyo ambién malmeso. Somos por a esfensa d’a soberanía alimentaria y d’o colectibo en contra d’o pribau.

Refirmamos os prozesos soberanistas que se dan a ran europeyo, y de bez expresamos a nuestra solidaridat con os prozesos d’articulazión patrioticos, antiimperialistas y de chustizia sozial que se fan en Latinoamerica, asinas como con os frens de resistenzia en Orién Meyo, y en espezial con a eroica luita d’o pueblo Palestino. Dende una delera internazionalista, refirmamos as lutias de toz os pueblos d’o mundo por a suya libertat y a suya dignidat.

Comisión promotora d’a candidatura a Parlamento Europeyo ”Iniziatiba Internazionalista”
15 de abril de 2009